Новости

Category: Модули отображения Контента
Published on Tuesday, 14 September 2010 11:20
Hits: 648

Отображает заданное количество материалов из выбранной категории, сортируя по дате, либо в случайном порядке. Помощь

Павлодар музыкалық колледжінің ұстазы, Қазақстан Композиторлар одағының мүшесі Мұхит Мұлқаразовтың шығармашылығына арналған «Менің жан сезімім» атты авторлық концерті өнерсүйер қауымға ерекше рухани әсер сыйлады. Бұл кеш – композитордың ішкі жан дүниесінің үніне айналған, сезім мен сырға толы музыкалық туындыларымен бөліскен сәт болды.
Мұхит Мұлқаразов– өз кәсібіне адал, өнер жолында көптеген шәкірт тәрбиелеп, ұлттық музыкаға сүбелі үлес қосып келе жатқан ұстаз. Оның шығармалары терең мазмұнымен, ұлттық болмыспен және заманауи нақышпен үйлескен әуенімен ерекшеленеді.
Кеш барысында әртүрлі аспаптық құрамдарға арналған шығармалар, жаңа әндер орындалып, көрермендерге рухани ләззат сыйлады. Сахна төрінде Рүстембек Омаров атындағы қазақ ұлт аспаптар оркестрі, үрлемелі аспаптар оркестрі, скрипкашылар мен қобызшылар ансамблі, балалар хоры және колледждің дарынды орындаушылары өнер көрсетті.
Кешке ҚР және облысқа танымал әншілер – Ғайни Жұмашева, Нұржан Сарқамбаев, Серік Рысбек, Мадияр Бахтияров, Әділет Сейітов, Әділ Төлеген, Райхана Оқтаубаева, сондай-ақ халықаралық және республикалық байқаулардың жеңімпаздары – Төрегелді Жасұлан, Жұмашев Рахымжан және Құрбан Рахат қатысты.
Концерт соңында Қазақстан Композиторлар одағының төрағасы Серік Абдинұров Мұхит Мұлқаразовқа одақтың мүшесі куәлігін табыстады. Бұл – ұстаздың еңбегінің жоғары бағалануы ғана емес, сонымен қатар еліміздің музыка өнеріне қосқан үлесінің дәлелі.
«Менің жан сезімім» кеші көрерменнің жүрегіне жол тауып, нағыз өнердің күші мен маңызын тағы бір мәрте дәлелдеді.
2025 жылғы 1–2 қараша күндері Семей қаласында XXVI Халықаралық «Көзге Ертіс Моңнары» татар өнері фестиваль-байқауы өтті. Бұл мәдени шара Қазақстанның түкпір-түкпірінен және жақын шетелдерден келген талантты орындаушыларды жинады. Қатысушылар өз шеберліктерін әртүрлі номинациялар мен жас ерекшеліктері бойынша көрсетіп, көрермендер мен қазылар алқасын ерекше өнерімен тәнті етті. Байқаудың негізгі мақсаттары – татар халқының музыкалық және мәдени мұрасын сақтау, насихаттау және дамыту, ұлтаралық мәдени байланыстарды нығайту, өңірлер мен мемлекеттер арасындағы шығармашылық диалогты жандандыру. Сонымен қатар, жас ұрпақтың өнерге, рухани құндылықтар мен мәдени болмысқа қызығушылығын арттыру болып табылады. Фестиваль бағдарламасына салтанатты ашылу рәсімі мен Гала-концерт, вокалистер, аспапта орындаушылар, мәнерлеп оқушылар, бишілер байқауы, көрмелер, қолөнершілер жәрмеңкесі, Татарстан мен Қазақстаннан келген әртістер мен ұстаздардың шеберлік сағаттары енгізілген.
«Көзге Иртыш моңнары» фестивалі дәстүрлі түрде татар және өзге де этностардың өнер өкілдерін бір арнаға тоғыстырып, Қазақстан, Ресей және басқа да елдерден қатысушыларды біріктіреді. Биылғы жылы ұйымдастырушылар 140-тан астам өтінімдерді қабылдады. Қатысушылар Астана, Павлодар, Екібастұз, Шымкент, Абай облысы және Ресейдің Кузбасс, Тара, Омбы, Новосібір, Қазан қалаларынан келді. Музыкалық колледждің гитара және баян класы студенттері өнер көрсетіп, жоғары нәтижелерге қол жеткізді. 13–15 жас аралығындағы санатта Манап Әлихан 1-орынды жеңіп алды.16–19 жас аралығындағы санатта Канат Рауан мен Рахимов Мадияр II дәрежелі лауреат атанса, Татарченков Максим III орынды иеленді. Жүлдегерлерді байқауға дайындаған ұстаздар: М.С.Ботагузов, А.А. Шевчук, С.Н.Тищенко. Бұл жетістіктер — оқытушылардың кәсіби еңбегі мен студенттердің жоғары дайындық деңгейінің айқын дәлелі. Жеңімпаздар мен олардың жетекшілерін шын жүректен құттықтаймыз!
Ахмет Жұбанов атындағы Халықаралық жас орындаушылар байқауына Қазақстан, Өзбекстан және Қырғызстан елдерінен 224 қатысушы қатысты. Бұл байқау жас музыканттарды бір арнаға тоғыстырып, олардың жоғары деңгейдегі орындаушылық шеберлігін және шығармашылық дамуға деген ұмтылысын айқын көрсетті. Бұл — жыл сайын дәстүрлі түрде Алматы қаласында өтетін іс-шара, Қазақстан Республикасы Мәдениет және спорт министрлігінің қолдауымен ұйымдастырылады. Биылғы жылы байқау «Үрлемелі», «Соқпалы» және «Ішекті» аспаптар бағыты бойынша өтті.
«Ішекті аспаптар» (скрипка) номинациясында 56 үміткер бақ сынаған байқауда, Комплекс құрамындағы музыкалық мектеп-интернаттың оқушылары жоғары нәтиже көрсетті. Данияр Әнел — III дәрежелі лауреат, Абильдинова Аделина — байқау дипломанты атанды. Жеңімпаздарды байқауға дайындаған ұстаздар Я.О.Касьян, А.А.Аветисян, ал концертмейстері М.Х.Колаян.
«Үрлемелі және соқпалы аспаптар» номинациясында 168 орындаушы үздік атағы үшін жарысты. Жасөспірімдер тобында музыкалық мектептің 5 оқушысы дипломант атанды: Шкурат Лия, Ақан Айнара, Новаковская Полина, Каменских Кира және Дюсенов Думан. Сонымен қатар, валторнада ойнаған Зайкин Тимур III орын, ал Шөлеке Аязби (труба) II орын иеленді. Орта топта Жұмашев Рахимжан (кларнет) және Ақан Ақнұр (валторна) дипломант атанды. Клопот Элизабета (флейта) III орын, ал валторнада өнер көрсеткен Омаржанов Заурбек II орынды жеңіп алды. Ең үлкен жетістік – жоғары жас санатында тіркелді: Павлодар облысының қоржынына алтын медаль алып келген I орын иегерлері — Түрегелді Жасұлан мен Құрбан Рахат. Сонымен қатар, Черных Георгий халықаралық байқаудың дипломанты атанды. Лауреаттардың концертмейстерлері: И.С.Дорошенко, А.Б.Куминов, Н.Д. Якшова. Жеңімпаздар мен жүлдегерлерді дайындаған ұстаздар: В.А.Шлегель, О.В.Шлегель, Э.С.Қайырбаева, А.К.Нұғманов, Д.А.Үсенов, А.Ш.Тен, М.К. Мулкаразов және Б.К. Каиыров.
Ахмет Жұбанов атындағы Халықаралық жас орындаушылар байқауының жеңімпаздарын құттықтаймыз!
Бүгін Павлодар облысының әкімі қатысқан салтанатты жиында «Тәуелсіздік ұрпақтары» жастар сыйлығының жеңімпаздары марапатталды.
Қуанышпен хабарлаймыз, МК-МК колледжінің студенттері және белсенді көшбасшылары Илья Аверин мен Дана Ибраева өз номинациялары бойынша жеңіске жетіп, өңір басшысының қолынан лайықты марапаттарын алды.
Илья Авериннің жеңісін ерекше атап өткіміз келеді — ол «Медиакоммуникация» номинациясы бойынша тарихта тұңғыш рет марапатталған шығармашыл жастардың өкілі ретінде Прииртыш мәдениетінің тарихына медиаконтент арқылы үлес қосып отырған алғашқы жеңімпаз болды.
Жеңімпаздарды шын жүректен құттықтаймыз! Шығармашылық табыс, жаңа белестер мен шабытты жобалар тілейміз!
Астана қаласында Шабыт шығармашылық академиясының ұйымдастыруымен өткен «Күй шебері» атты I-Республикалық домбырашылар байқауына еліміздің түкпір-түкпірінен 100-ден астам өнерпаз күйші қатысты. Байқау аясында жас домбырашылар ұлттық өнердің қыр-сырын шеберлікпен танытып, күмбірлеген күймен көрермендердің жүрегін жаулап алды.
Жас таланттар күйшілердің классикалық туындыларын орындап қана қоймай, заманауи бағыттағы шығармалармен де ерекше көзге түсті. Бұл байқау күй өнерінің дамуына жаңа серпін беріп, жас буын арасынан болашақтың күй шеберлерін анықтауға зор мүмкіндік берді.
«Күй шебері» атты домбырашылар байқауының мақсаты: Қазақ халқының дәстүрлі күй өнерін дәріптеу, насихаттау және жастар арасында кеңінен тарату және дарынды, өнерлі домбырашыларды анықтап, олардың шығармашылығына қолдау көрсету.
Байқауда бас жүлдені жеңіп алып, 350 мың теңгелік күміс домбыраға ие болған – Байбосынова Толқын Марсовнаның шәкірті, 1 курс студенті Бодыков Ислам.
Дарынды студент Қ.Ахмедьяровтың «Ақ мешіт» күйін шеберлікпен орындап, қазылар алқасының жоғары бағасына ие болды. Оның орындауындағы күй тыңдарманның жүрегіне жол тауып, байқаудың басты жүлдесіне лайық деп танылды.
Сонымен қатар: - І орын – Қаиркен Диас, ІІ орын – Қаир Әмір, ІІІ орын – Абдихаликов Дархан және Жұмабек Кәрім ие болды.
Бұл – колледждегі ұлттық өнерге деген терең құрмет пен үздіксіз еңбектің нәтижесі. Осындай биік жетістіктерге қол жеткізуде еңбек еткен ұстаздар: Утемисова Салтанат Рысбековна, Сайлауов Нұрман Болатбекұлы — шәкірттерінің талантын шыңдап, оларға жол көрсетті.
Байқаудың қазылар алқасы да танымал өнер қайраткерлерінен құралған. Төрағасы – күйші, зерттеуші Жанғали Жүзбай, ал мүшесі – белгілі күйші Дарын Құдайберген.
Бұл жеңіс – тек колледж мақтанышы емес, бүкіл Павлодар облысының мәдени дамуына қосылған зор үлес. Студенттерімізге шығармашылық табыс, ұстаздарға алғысымыз шексіз!

"Музыкалық колледж - дарынды балаларға арналған музыкалық мектеп-интернат" кешені" мемлекеттік мекемесі