muscomplexpavl.edu.kz
2022,наурыз,1 Музыкалық колледжде «Самға» жобасы бастау алды
Павлодар облысының мәдениет, тілдерді дамыту және архив ісі басқармасы мен Павлодар облысының білім беру басқармасының қолдауымен Иса Байзақов атындағы Павлодар облыстық филармониясы мен «Музыкалық колледж-дарынды балаларға арналған музыкалық мектеп-интернат» кешені» ММ «Балалар жылына» арналған «Самға» атты бірлескен жобасын іске қосты.
Жаңа жоба музыкалық колледж базасында салтанатты іс-шарамен басталды. Кешеннің студенттері мен оқушылары Иса Байзақов атындағы Павлодар облыстық филармониясының кәсіби шығармашылық ұжымдарымен бір сахнада өнер көрсетті.
Жобаның мақсаты: қоғамның жас өкілдерін үйлесімді дамыту, өскелең ұрпаққа жалпыадамзаттық, ұлттық, мәдени құндылықтарды дарыту және дарынды балалар мен жастарды қолдау, табысты бастамалар үшін жағдай жасау.
Іс-шараны Қазақстан Республикасының Мәдениет қайраткері Т.Б. Кәрімовтың жетекшілігімен қазақ халық аспаптарының студенттік оркестрі ашты.
Музыкалық колледж басшысының орынбасары А.А. Карашина жобаға қатысушы оқушылардың өнер көрсетулері жыл бойы филармонияның музыкалық ұжымдарының концерттік бағдарламаларына енгізілетінін, қазақ халық аспаптары бөлімінің оқушылары Рүстембек Омаров атындағы Қазақ халық аспаптары оркестрінің концерттік бағдарламасына қатысатынын атап өтті.
Колледждің хор дирижерлеу бөлімінің оқушылары филармонияның камералық хорының концертіне, ал орыс халық аспаптары бөлімінің оқушылары «Лад» орыс халық аспаптары ансамблінің концерттік бағдарламасына қатысатын болады. Оқушылардың қойылымдары «Ән домбыра» халық жанрын орындаушылардың концерттік бағдарламасына енгізіледі.
Музыкалық колледжде жас музыканттардың шығармашылық қабілеттерін дамытуда бірлескен «Самға» жобасы орындаушылық шеберлікті жетілдіруге және кәсіби ұжымдарда, кәсіби сахнада жұмыс істеу дағдыларын жетілдіретінін хабарлады.
